ⴰⵏⵖⵎⴰⴰⵙⵉⵡⴹ ⵙ ⴰⵙⵏⵎⴰⵍⴰ ⵏ ⵡⴰⵙⵙ ⵏ ⵜⵖⵓⵔⵉ ⴰⵏⴰⵎⵓⵔ ⵅⴼ ⵉⵎⵔⵙⵉ: ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵏⴳⵔⴰⵡ ⴰⵙⴳⵎⴰⵏ: ⵜⵉⵍⴰⵡⵜ ⵏ ⵓⵙⵉⴷⴼ ⴷ ⵓⵎⵙⴰⵔⴰⵙ ⵏ ⵓⵙⵎⴰⵜⴰ”.

ⴰⴼⴰⴷ ⴰⴷ ⵏⵙⵎⵀⵍ ⵉⵙⵖⵍⴰⴼ ⵏ ⵓⵏⵎⵓⵇⵇⴰⵔ ⴰⵙⴳⴰⵡⴰⵏ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵀⵍⴰ ⵏ ⵜⵣⵏⵉⵜ, ⵉⵏⵎⴰⵍⴰⵏ ⴰⵙⵙ ⵏ 18 ⵏⵓⵡⴰⵏⴱⵉⵔ 2974 ⵏⵏⴰ ⵉⴼⴼⵖⵏ ⵙ ⴰⴷ ⵉⵜⵜⵓⵙⴽⵉⵔ ⵢⴰⵏ ⵡⴰⵙⵙ ⵏ ⵜⵖⵓⵔⵉ ⴰⴷ ⵉⵙⵙⵓⵜⴳ ⵜⵉⵣⵉⴳⵣⵜ ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵏⴳⵔⴰⵡ ⴰⵙⴳⵎⴰⵏ, ⵅⴼ ⴰⴷ ⵏⴰⵡⵉ ⵜⴰⵖⴹⴼⵜ ⴰⴷ ⵏⵎⵎⴹⴼⵕ ⵉⵎⴰⵢⵏⵓⵜⵏ ⵉⵣⴷⵉⵏ ⴷ ⵓⵙⴷⴰⵡ ⴰⴷ ⴰⵏⴰⵎⵓⵔ, ⵏⵙⵙⵖⴱⵓ ⴰⵎⵙⴳⴷⴰⵍ ⵅⴼ ⵜⵙⵉⵡⴰⵖ ⵏⵏⵙ ⴷ ⵉⴷⵉⵔⵏ ⵏⵏⵙ; ⴰⵔ ⵉⵙⵏⵎⴰⵍⴰ ⵡⴰⵢⵢⴰⵡ ⴰⵙⴳⴰⵡⴰⵏ ⵏ ⵜⵎⵙⵎⵓⵏⵜ ⵜⴰⵏⵎⵏⴰⴹⵜ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⵓⵙ ⵎⴰⵙⵜ ⴳ ⵜⵣⵏⵉⵜ, ⵙ ⵜⴷⵔⴰⵡⵜ ⴰⴽⴷ ⵜⵎⵙⵎⵓⵏⵉⵏ ⵜⵉⵏⴰⵎⵓⵔⵉⵏ ⵜⵜ ⵢⵉⵡⵉⵏ ⴳ ⵓⵙⴽⴽⵉⵏ ⴰⵙⴳⵎⴰⵏ ⴰⵎⴰⵣⵉⵖ, ⵢⴰⵏ ⵡⴰⵙⵙ ⵏ ⵜⵖⵓⵔⵉ ⴰⵏⴰⵎⵓⵔ ⵅⴼ ⵉⵎⵔⵙⵉ: “ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵏⴳⵔⴰⵡ ⴰⵙⴳⵎⴰⵏ: ⵜⵉⵍⴰⵡⵜ ⵏ ⵓⵙⵉⴷⴼ ⴷ ⵓⵎⵙⴰⵔⴰⵙ ⵏ ⵓⵙⵎⴰⵜⴰ”, ⴰⵙⵙ ⵏ ⵓⵙⴰⵎⴰⵙ 16 ⵢⵓⵏⵢⵓ 2975 ⴳ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⴷ ⵓⵙⵎⵓⵜⵜⴳ ⴳ ⵜⵖⵔⵎⵜ ⵏ ⵜⵣⵏⵉⵜ.

ⵉⵡⴰⵜⵙ ⵓⵏⵎⵓⵇⵇⴰⵔ ⴰⴷ ⴰⵎⴰⵙⵙⴰⵏ ⴰⴷ ⵉⵙⵙⵓⵜⴳ ⴰⵣⴰⵣⵓ ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵏⴳⵔⴰⵡ ⴰⵙⴳⵎⴰⵏ ⵙ ⵡⴰⴽⴰⵣ ⵏ ⵜⵙⵉⵡⴰⵖ ⵜⵓⵚⴽⵉⵡⵉⵏ ⴷ ⵜⴱⵉⴷⴰⴳⵓⵊⵉⵢⵉⵏ ⵏⵏⴰ ⵉⵎⴷⴷⵉⵏ ⵉ ⵓⵣⵣⴳⵉⵔ ⵏⵏⵙ ⴷ ⴰⴷ ⵉⵙⵙⴰⴳⴳⵯ ⵉⴷⵉⵔⵏ ⵏ ⵓⵙⵎⴰⵜⴰ ⵓⵎⵀⵉⵍ ⵙ ⵓⵢⵍⵍⵉ ⵉⵙⵉⵍⵉⵏ ⵜⵉⵎⵔⵉⵙⵉⵏ ⵜⵉⵣⵔⴼⴰⵏⵉⵏ ⴷ ⵜⵎⵔⵙⴰⵍⵉⵏ. ⴰⵏⵎⵓⵇⵇⴰⵔ ⴰⴷ, ⵔⴰⴷ ⴳⵉⵙ ⵜⴷⵔⵓ ⵢⴰⵜ ⵜⵓⴼⵔⵉⵏⵜ ⵏ ⵉⵎⵔⵣⵓⵜⵏ ⴷ ⵉⵎⵥⵍⴰⵢⵏ ⴳ ⵢⵉⴳⵔ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⵢⵉⵍⵉ ⴳ ⵓⵖⴰⵡⴰⵙ ⵏⵏⵙ ⴰⵎⴰⵙⵙⴰⵏ ⴽⵕⴰⴹⵜ ⵜⴳⵉⵡⵔⵉⵏ ⵜⵉⴷⵙⵍⴰⵏⵉⵏ: ⵜⵉⵏⴰⵡⵜ ⵜⴰⵎⴰⵙⵙⴰⵏⵜ ⴷ ⵢⵉⵡⵉⵏ ⵅⴼ ⵜⵖⴰⵡⵙⵉⵡⵉⵏ ⵜⵉⵎⵉⵥⵉⵕⵉⵏ ⵉⵣⴷⵉⵏ ⴷ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵢⴰⴽⴽⴰⵏ ⵢⴰⵜ ⵜⵖⵔⵉ ⵜⴰⵙⴼⵙⴰⵢⵜ ⴳ ⵓⵣⴰⵣⵓ ⵏ ⵓⵙⵉⴷⴼ ⵏⵏⵙ ⴳ ⵓⵏⴳⵔⴰⵡ ⴰⵙⴳⵎⴰⵏ; ⵜⴰⵙⵇⵇⴰⵢⵎⵓⵜ ⵉⵥⵍⵉⵏ ⵙ ⵓⵙⵏⵏⴼⴽⴰ ⵏ ⵜⵉⵔⵎⵉⵜⵉⵏ ⵜⵉⵙⴳⵎⴰⵏⵉⵏ ⴷ ⵓⵎⵙⴳⴷⴰⵍ ⵏ ⵜⵏⵥⴰⵕ ⴰⴽⴽⵯ ⵉⵣⴷⵉⵏ ⴷ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵡⵉⵔ ⴰⵏⴰⵎⵓⵔ; ⴷ ⵢⴰⵜ ⵜⴳⵉⵡⵔⵜ ⵜⴰⵙⵎⵓⵔⴰⵏⵜ ⵜⴰⵎⵢⴰⵖⵜ ⵏ ⵓⵙⵔⵓⵙ ⵏ ⵉⵙⵖⵍⴰⴼ ⵓⵎⵀⵉⵍⵏ ⵏⵏⴰ ⵉⵎⵏⴰⴷⵏ ⴰⴷ ⵙⴷⵓⵙⵏ ⴰⵣⴰⵣⵓ ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵏⴳⵔⴰⵡ ⴰⵙⴳⵎⴰⵏ.

ⴰⵎⵓⵙⵙⵓ ⴰⴷ ⵉⵖⵔⴰ ⵉ ⵉⵎⴳⴳⴰⵢⵏ ⴰⴽⴽⵯ ⵉⵙⴳⵎⴰⵏⵏ ⴷ ⵡⵉⴷ ⵜⵜ ⵢⵉⵡⵉⵏ ⴳ ⵓⵙⴽⴽⵉⵏ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ.